Á spítalanum vinna margir aðilar og margir foreldrar eru þar með börnin sín. Foreldrar sem dvelja á nýburadeild ættu að sýna hvort öðru virðingu og skilning. Börnin eru misjafnlega mikið veik og þurfa mismikla aðstoð í mislangan tíma en foreldrar upplifa yfirleitt svipaðar tilfinningar og eru allir foreldrar hræddir um nýfædda barnið sitt. Foreldrar sem eiga fullburða börn eða börn fædd stuttu fyrir tímann gætu upplifað mikið áfall ef innlögn er óvænt og óvíst um alvarleika ástands barnsins.
Foreldrum sem eiga litla veika fyrirbura og dvelja lengi á sjúkrahúsinu gæti þótt óþægilegt að fá stöðugt nýja foreldra á deild með sér með börn sem eru þar í nokkra klukkutíma eða daga og fara svo jafn óðum heim. Fyrirburaforeldrar ættu þó að reyna að sýna þessum foreldrum virðingu og skilning því þó þeirra barn sé ekki jafn lítið og óþroskað og litlu fyrirburarnir þá gæti það verið alveg jafn veikt. Erfitt er að vita hvað hafi gengið á á undan, hvort naumlega hafi tekist að bjarga barni eftir erfiða fæðingu, hvort barnið hafi fengið krampa eða súrefnisskort eða sé alvarlega veikt. Jafnvel þó barnið sé rétt í stuttu eftirliti þá gætu foreldrarnir átt slæma reynslu að baki frá fyrri meðgöngu eða vegna annara hluta. Því er gott fyrir alla að venja sig á að sýna öllum virðingu og tillitsemi því við vitum aldrei hvað hinir eru að ganga í gegnum.