Fylgjulos

Fylgjulos getur átt sér stað þó fylgjan sé staðsett á eðlilegan hátt og á eðlilegum stað (1). Fylgjulos lýsir sér þannig að fylgjan losnar frá legveggnum og fer að blæða í kjölfarið. Einkenni fylgjuloss eru blæðingar og verkir hjá móður og uppgötvast fylgjulos gjarnan í kjölfar blæðinga frá legi en einnig getur blæðingin verið staðbundin inni í leginu.

 

Fylgjulosi er skipt í fjögur stig eftir alvarleika:

  1. frá því að vera mjög lítið og greinast ekki fyrr en við skoðun fylgju eftir fæðingu
  2. í lítilsháttar rifu sem orsakar blæðingar og hefur áhrif á móður en engin áhrif á lífsmörk barns
  3. í miðlungs rifu frá legvegg þar sem hægt er að greina streitu hjá fóstri, legið er spennt og verkir fylgja alvarlegasta stigið er svo
  4. algert fylgjulos þar sem án skjótra læknisinngripa mun móðir missa blóð og barnið lendir í lífshættu (1).

 

Fylgjulos getur verið lífshættulegt ástand fyrir móður og barn vegna blæðinga og þegar fylgjan losnar frá legveggnum stöðvast blóð- og súrefnisflæði til barnsins. Ef algert fylgjulos á sér stað verður barnið því að fæðast sem fyrst (2) og er oft gripið til þess að sækja barnið með bráðakeisaraskurði (1). Ef blóð- og súrefnisflæði til barnsins stöðvast í kjölfar fylgjuloss getur það haft alvarlegar afleiðingar fyrir barnið (2).

 

Ástæða fylgjuloss er ekki að fullu viss en eftirfarandi vísbendingar teljast áhættuþættir: Konan er fjölbyrja, naflastrengurinn er stuttur, langvarandi háþrýstingur hefur hrjáð móður eða hún hefur haft hann á meðgöngu. Einnig er vitað að fylgjulos getur verið afleiðing af slysi eða áfalli sem kona verður fyrir, til dæmis bílslysi eða falli. Einnig auka reykingar og vímuefnaneysla hættuna á fylgjulosi (1).

 

Heimildir:

Pillitteri, A. (2003). Maternal & Child Health Nursing: Care of the Childbearing & Childrearing Family (4. útgáfa). Philadelphia: Lippincott Williams og Wilkins.

  1. Pompa, K. M. og Zaichkin, J. (2002). The NICU baby. Í J. Zaichkin (Ritstj.), Newborn Intensive Care: What Every Parent Needs to Know (2. útgáfa, bls 117-139). California: NICU INK Book Publishers.

Félagið

Félag fyrirburaforeldra var stofnað árið 2008.

Félagið er ætlað öllum fyrirburaforeldrum til að hittast og ræða saman og til að gæta hagsmuna fyrirbura og foreldra þeirra.

Væntanlegt er hér á vefinn upplýsingar um félagið og lög þess og hvað helst sé á dagskrá hjá félaginu hverju sinni.

Aðalfundur verður haldinn snemma árs og eru áhugasamir beðnir um að fylgjast auglýsingu hér á vefnum og á facebook síðu fyrirburaforeldra.

Um síðuna

Umsjónarmaður síðunnar er Drífa Baldursdóttir lýðheilsufræðingur og fyrirburamóðir. Hægt er að hafa samband í gegnum vefpóst á drifa@fyrirburar.is

Heimasíðan er unnin af Drífu Baldursdóttur fyrirburamóður. Sambýlismaður hennar Sveinbjörn Hafsteinsson og fyrirburamamman Baddý Sonja Breidert sáu um tæknilegu hliðina við uppsetningu heimasíðunnar.

Um verkefnið

Fræðsluefnið sem er á síðunni vann Drífa sem meistaraverkefni í Lýðheilsufræðum við Háskólann í Reykjavík árið 2009, undir leiðsögn dr. Geirs Gunnlaugssonar prófessors við skólann og með samvinnu við yfirmenn Vökudeildar Barnaspítala Hringsins, Þórð Þórkelsson yfirlækni og Ragnheiði Sigurðardóttur deildarstjóra.
Þróunarverkefnið um gerð vefsíðunnar fyrirburar.is hlaut styrk frá Nýsköpunarsjóði Námsmanna árið 2009.

Þessi heimasíða er tileinkuð Hildi Arneyju dóttur Drífu sem kom í heiminn 11 vikum of snemma, því án hennar innkomu í líf hennar hefði þetta verkefni aldrei orðið að veruleika.